احلام

النهاردة كنت في بورسعيد مع أهلى في زيارة خاطفة لعمي هناك . سافرنا الأحد مساءا و رجعنا النهاردة. الحمد لله الرحلة كانت جميلة و ممتعة و جت في وقتها الصراحة قبل امتحانات الميد تيرم (نصف)^2 السنة.
كالعادة استغليت الموقف و رحت هربت اتجاه المياه الجارية التي اعشقها كالنخاع و كالعادة انطلق في الحوار الأبدي اللي من طرف واحد "اللي هو انا"
بس اللي زن على دماغي جدا اني افكر في احلامي اللي حلمتها من و انا صغير لغاية دلوقتي و قدام ان شاء الله.

و رحت قعدت افتكر
افتكرت لما كان حلمي المستمر من زمان لحد ما اموت ان شاء الرحمن اني اكون مع رسول الله صلى الله عليه وسلم في جنات الخلد . حلم مكلف جدا بس يستحق كل التضحية من أجله
حلمت بأفريقيا المسلمة
كنت كل ما اشوف فيلم اجنبي او فيلم تسجيلي عن افريقيا احس ان الناس دي ناقصهم الاسلام
بجد ناقصهم قوي
حلمت بالصلاة في المسجد الأقصى و الاستناد على حائط البراق كي اتذكر مجد كبير مهدر مش علشان حاجة إلا لإننا مانستاهلوش.
حلمت بأكبر مركز اسلامي في انجلترا و منها لكل بلاد أوربا و أمريكا. تلك الإمبراطورية التي لا تغيب عنها الشمس اللي طول عمري مقتنع انهم من الناس اللي اذا وكلت اليهم شئ يقدروا ينفذوه بحرفية عجيبة.
حلمت بيخت كبير و كاميرا تصوير الف بيهم العالم اصور الناس و الأرض و السماء و البحر و اسجل مشاعر و احاسيس و عمل و كفاح و خير و شر.
حلمت اكون من الناس اللي طبقت اللي اتعلمته و افادت بيه الاسلام و الناس و اني اكون في كل لحظة ملك للكل و ليس لنفسي.
حلمت اني اقدر اوفى جزء و لو صغير من الفيض المستمر الخصب من افضال والدي و والدتي على. اكون خير سند ليهم في كبرهم و لما يحتاجوني اكون عندهم قبل ما يفكروا يطلبوني.
حلمت بزوجة تكون فاهماني و عارفاني كويس. ماتكشرش في وشي لما اكون فرحان و تحاول تسعدني لما اكون زعلان . تحتويني و تستحملني. تكون ليا كل حاجة و اكون انا لها كل حاجة . اقدر احميها و اهنيها و افرحها و لما اكبر و اعوز اغلس عليها تقولي اختشي مش احنا كبرنا على الحاجات دي بكل دلع و حب.
حلمت ببنت اغرس فيها كل اللي كان نفسي يكون فيا و في كل بني آدم من حب للاسلام و فهم شامل ليه كمنهج شامل لحياتنا كلنا. اغرس فيها حب الناس و احترامهم و التعايش معاهم . تكون مرحة و منطلقة و محبوبة بس في الصح و من الصح. اشوفها يوم فرحها و هي رايحة للعريس اللي اختارته صح يبنوا و يعمروا أسرة و مجد و نور نفسي اشوفه قبل ما اموت.
حلمت اني امشي في الشارع مالقيش شيوخ و نساء و اطفال نايمين في الشوارع على الأرصفة و مالقيش ابن بيبكى ابوه المعتقل و لا امه المنتهك عرضها.
حلمت بمصر ترجع تاني مقبرة الغزاة مش بار للغزاه
حلمت بخير اجناد الأرض لما صرخوا في كل مجال اقتحموه علشان يثبتوا انهم الأفضل كما كان عهد الناس بهم.
حلمت اسافر اليابان و الصين و ماليزيا و المانيا و انجلترا و فرنسا و روسيا و امريكا و بلغاريا و فنزويلا و نيجيريا. وماحدش يسألني اشمعنى دول
حلمت يكون عندي عربية بورش و فيلا على شواطئ جزر الهاواي.
حلمت أموت و أدفن في مكة المكرمة.

المهم فقت من التفكير ده و من كلامي مع البحر و رحت أصلي العصر في مسجد في بورفؤاد جنب المعدية كبير قوي كده و بعد الصلاة رقدت و كملت احلام و كان الجو جميل جدا

و بعد كده رجعت لأهلى في نادي اليخت و لعبنا الطمبولة و ماكسبناش حاجة كالعادة

الحمد لله على نعمة الاسلام و نعمة السعادة و نعمة الحفظ و السلامة و نعمة الرحم و صلته و الحمد لله على نعمة من أحب وأجل النعم
نعمة
الحـــــــــــــــــــــــــــــــــلـــــــــــــــــــــــــم