عناوين

يا خبر اسود:

النهاردة مصادفة شاهدت جزء من برنامج الحقيقة للمذيع اللامع وائل الإبراشي . و كان عنوان حلقة اليوم هي الجزء الثالث من سلسلة حلقات تتناول فضائح خاصة بمسابقة ملكة جمال مصر.
كنت قرأت من فترة عن الحلقتين السابقتين و الاتهامات الملقاة من امهات بعض المشاركات في المسابقة للجنة المنظمة بالاخلال بقواعد الاخلاق و القيم بتوزيع الخمور و وجود شباب و فتيات في غرف واحدة مما دعا لأن يكون هناك رشاوي لنجاح متسابقات على حساب الاخريات.
طبع مش هيكون كلامي على احقية مين فيهم فهم كلهم في أقرب سلة مهملات و لن اتخيل انهم ممكن يشغلوا حيز تركيز الناس إلى جانب فلسطين المنسية مثلا .
لكن هالني موقف ما. كان هناك محام استضافه البرنامج لتحليل الاتهامات و الرجل تحدث من واقع ايمانه بكلام الدين و الشرع و الدستور المصري اللي بينص في مادته التاسعة على ان الأسرة هي اساس المجتمع و بيقول بحسن نية ان الغلط في الاساس مسابقة زيمسابقة ملكات الجمال لانها بتدمر قيم المجتمع المصري و الدين و الدستور يرفضوها.
راحت واحدة من المتسابقات ردت و قالت له احنا معانا تصريح من وزارة السياحة و الاداب و الكلام ده مافهش حاجة و لو انت بتفكر كده يبقى ما تفتحش التلفزيون و لا تمشي في الشارع و لا تصيف لاننا متحررين مش متخلفين. برضه مش ده الكلام اللي هعلق عليه لانه ناقص عقل و كرامة بس اللي لاحظته حاجة . الراجل مقدرش يرد لان نفسه عزت عليه انه يرد عليها و علشان حاجة تانية . النفــــــــــاق . بلد دستورها بيقول ان الاسلام هو المصدر الرئيسي للتشريع و الاسرة هي الاساس و حكومتها و نظامها بيهينوا المواد دي و بيرخصوا البلاوي دي . فطبيعي يكون كلام البنت قانوني. معاها ترخيص. طب نرد نقول ايه. نقول قيم . طب ما هو القانون بيقولها دي قيم. نفـــــــــــاق. و بعدين مش عارف فين شيخ الأزهر و للا المفتي اللي ماسك في بول النبي صلي الله عليه و سلم و سايب شباب مصر بينحدروا كل يوم لهاوية أكبر و أكبر .
حسبي الله و نعم الوكيل
--------------------------------------
جمل لزقت:

من فترة كنت شفت سؤال بيتسئل و فكرني بمواقف تانية خلتني اتساءل . ليه الجمل دي لزقت في امخاخ و وعي الناس؟
السؤال بيقول ايه شعورك لما بتشوف واحد لابس جلابية و بدقن . الرد اللي شفته من كذا واحد هو انه بيسأل الراجل ده باصصلي ازاي!!!!
ليه افترضنا ان اللحية و الجلابية هتخلي صاحبهم يكون تفكيره مش طبيعي و اساسه انه لازم يكون سئ الظن بالناس !!!!!! ليه الناس دي ماخدتش بالها ان السؤال ببقى هو اللي يتوجه للشخص ده. بيبقى ايه شعورك لما الناس التانية بتشوفك ؟ هيقولك اني مظلوم . الناس بتبصلي بشك و ريبة و سوء الظن في كل موقف او تصرف بيصدر مني.
كل ده علشان جمل لزقت في وعي الناس
كان مرة الشيخ وجدي غنيم بيقول انه كان معدي في الشارع و الناس بصاله بريبة و فجأة عجلة عربية فرقعت فالناس كلها بصت له و على وشها رعب الدنيا و الأخرة . خلاص لزق في دماغ الناس صورة و استمرت في ذهنهم.
زي اللي بيقولوا لواحد ملتزم او واحدة منتقبة ايه اللي انتوا عاملينه في نفسكم ده . ما تعيشوا شبابكم . طب ليه مانقلبش السؤال. ليه ماترحوش لبنت عريانة و تقلولها ايه اللي انت عاملاه ده دا انت المفروض واحدة ست. او تروح لولد منحل و تقوله يابني ايه ده . عيش حياتك صح. و لكنها احوال لزقت في دماغ الناس.
و زي اللي كان بيقولك العالم دلوقتي وصل للفضاء و احنا بنقول ندخل الحمام باليمين و اللا الشمال. و ليه لم يقل انهم وصلوا الفضاء و احنا على النواصي و الجيل في الشعر و البنت في دراع الولد و السهر امام التلفزيون لتاني يوم الصبح. ليه الناس مش بتقول نبقى نعمل فروضنا الأول و بعد كده نبقي نشوف موضوع الجيل في الشعر زي ما بتقول نقبي نشوف الفروض الأول و بعد كده نشوف موضوع اللحية. كل ده علشان جمل لزقت في عقول الناس و وعيها و لازم الجمل دي تتقيم و يتوضع لها حلول.
----------------------------------
الدايت و هل نكلم الناس كلها:-

"هذا من ناحية المبدأ..أما من حيث المضمون فإن اهتمام الغرب بعمرو خالد رهن بالنموذج الإسلامي الذي يبحث الغرب عن ترويجه والتسويق له في المرحلة المقبلة ضمن استراتيجية معروفة لنقل المعركة داخل الإسلام نفسه..طبعا في هذا الإطار لن يجد الغرب أفضل من " الأخ " عمرو خالد الذي يقدم ما أسميته في دراسة نشرتها عنه قبل أربعة أعوام "الدايت إسلام" أو " الإيركونديشن إسلام" ..إسلام منزوع المقاومة وبلا أي نفس نضالي..إسلام الرفاهية الذي أقصي ما يطمح له هو "أسلمة" الغرب وتوطين أفكاره وقيمه الأساسية في العالم الإسلامي بعد أن يكسوها بديباجات إسلام".

هذا مقطع من مقال لباحث مصري و صحفي "المقال" و فيه يتناول قضية اثيرت على خلفية استلام عمرو خالد لجائزة التايم الأمريكية و تصريحه بانه لو جاءت ليفيني لتصافحه لصافحها و حدثها عن الاسلام و حق الفلسطينيين ردا على السؤال الخبيث لعمرو أديب نجم الأوربت. يتحدث الباحث من خلال ذلك الجدل الثائر هذا الأيام عن مبررات اختياره و التي تحدث عنها أيضا الاستاذ محمود سلطان في مقاله بعنوان عمرو خالد في أمريكا و الذي ذكر فيه نفس مضمون الأختيار . هل نحن فعلا نحتاج الاسلام الدايت . لا أظن هذا اطلاقا. انه نفس الاسلام الذي كما حدثنا عن الجنة و نعيمها الأزلي حدثنا عن النار و عذابها المقيم . و الذي كما حدثنا في السلام حدثنا في الجهاد . لان الله سبحانه و تعالى الأعلم بالنفس البشرية و ضرورة موازنتها لكل الأحوال . لا تغليب لطرف عن الأخر مادام في الحق و للحق. سؤال أخر هل لفرد واحد ان يحدث العالم كله . لا أظن هذا ايضا و هذا لابد و يكون مدركه عمرو خالد . لانهم كما كسب عقول و قلوب شباب كثير . خسر عقول شباب كثير أيضا . قد تكون تنازلات لم يرض بها طرف . او توافق افكار وافق عليها طرف . و لكن اختلف فيه الناس. و لم يسمعه كل الناس . فظني انه مش كل الناس لازم هيكلمهم فرد واحد و ده ردي على موضوع ليفيني و اللي مايشرفش اي حد انه يلطخ ايده بدم الفلسطينيين عندما يصافح يد المغموسين بها. ليفيني لا تمثل نفسها . هي تمثل كيان صهيوني غاشم قذر لا يزين تاريخه إلا المجازر و المأسي. لا اظن انها تحتاج لتوضيح. هذا لا يقلل من تقديري للعديد من أعمال عمرو خالد الكبيرة مقاما و تأثيرا زي صناع الحياة أو برنامجه الرائع دعوة للتعايش و اللي لم يطرأ على أحد من زمن بعيد ان تحدث فيه. لكنه موقف كان لابد أن اسجله و أشعر انه لا يناسب تفكيري.
-----------------------------------
العبارة:

لن ننسي القتلة
لن ننساك يا ممدوح يا اسماعيل
أيها القـــــــــــــــــاتل
و أعوانك القتلة
الكلاب