احنا شعب مسلسلات

احنا شعب ربنا ابتلاه بداء عجيب اسمه المسلسلات العربية. الداء ده مش في كونه اننا مدمنين فرجة عليها قدر ما زرعته المسلسلات دي في عقول و نفوس الناس.
يمكن داء الإدمان ده ليه مبررات كتير من الهروب من الواقع و الواحد يشوف مناظر بيوت و فلل و سفريات و بشر ما يتشافوش غير في المسلسلات . او هو رغبتهم في انهم يتخنقوا و أنا ساعات بحس اني بخنق على نفسي لما تلاقيني قاعد بعد 10 سنين امام المرة المائة لمسلسل " لن أعيش في جلباب أبي". و يمكن ساعات إن المسلسلات بتكون نادرا حلوة.
لكن الداء الأهم من داء الإدمان هو اللي زرعته المسلسلات في عقول و نفوس الناس. للداء أنواع

1- "الشرير لازم يضرب بالجزمة في أخر المسلسل"
مين من المسلسلات لم يخرج من التيمة دي. لابد العقاب يكون للشرير في أخر المسلسلات . ازاي ممكن يكون في شرير و المسلسل يخلص من غير ما يجراله حاجة تفش غل المشاهدين فيه . عقاب المفسد أو الشرير في الحياة موجود لكن مش هو الصورة الوحيدة . احنا أمة الله سبحانه و تعالى قدر لها ان عقابها هيؤجل و قد يكون في الدنيا أو الأخرة أو كلاهما .
لكن لأ ... هيتعاقب يعني هيتعاقب . المصيبة التيمة دي خلت ناس كتير مش قادرة تقول على النظام الحاكم مثلا أو الفاسدين إنهم وحشين . طب ازاي ماهو بقاله 50 سنة على قلوبنا مجرالوش حاجة. و ظني إن الرئيس لو مات موته ربنا ممكن تلاقي ناس عملاله مقام زي مقام سيدي الكتكوت. ماهو مجرالوش حاجة في أخر المسلسل زي ما المؤلفين بيقولوا. و قس على ذلك في فساد كبير ممكن الناس ماتلاحظوش علشان نفس السبب الكئيب ده. حتى المرة إللى شفت فيها مسلسل طلع في الأخر الشرير ماتعاقبش و سابها المؤلف نهاية مفتوحة اعتبروه فشل في تأليف نهاية.

2- "الحب و سنينه"
مسلسل رومانسي هتلاقيه , سياسي هتلاقيه , كوميدي هتلاقيه , ديني هتلاقيه
لازم حد يحب حد في المسلسل . بطل و بطلة . كومبارس و كومبارسة , قطط في بعضيها. المهم المبدأ موجود. يمكن المشكلة ما تكونش في الحب ذاته ماهو شعور و غريزة أساسية هيمر بيها أي بشري في الكون فممكن يكون تربة خصبة يتبني بيها فكرة مسلسل أو فيلم. المشكلة فعلا في نقط تانية . أولها الإنجاز . ماهو المسلسل مش هيتعرض طول العمر . 30 40 50 حلقة جزئين تلاته بالكتير. فقصص الحب أقصاها بتنتهى أحداثها في مدة أقصاها شهرين تلاتة. اتجوزوا ,اطلقوا , اي هباب المهم انه بيخلص . فالناس بتزرع فيها إحساس إن الموضوع مش هيطول. لكن يفاجأ الأخ أو الأخت من دول إن الموضوع بدأ و أدينا قاعدين شهر و اتنين و تلاتة و سنة و سنتين و الموضوع مش راضي يخلص . الله . مش هو كان بيخلص في يومين . و يتربن الواحد منهم و يستغرب. يابني ماهو اتزرع فيك ماركة مسجلة مسلسلاتنا الجميلة .
حاجة كمان . تلاقي حاجات بتحصل بين المحبين تبقى تموت و تعرف سابوا ايه لبعد الجواز يعملوه . طبعا كورنيش و لب و ترمس و خناق و ايدك في ايدها و طبعا عيش يا سيدي و بجد هتفطس و تقول . ابوس ايديكم سيبوا حاجة لبعد الجواز . الناس بقت حاسة ان المواقف دي لازم تكون فرض عليها . مايبقاش حب لو ما عدتش عصفورة و .... عليه و هو بيحب حبيبته على الكورنيش . و غيره.
ده غير السطحية إللى بتظهر العلاقات دي في المسلسلات و الكروته في المشاهد علشان المسلسل يدوبك 90 حلقة و 90 زيهم إعلانات فيلتبس على الناس بعدها.

3- " الجامعة"
يالهواااااي . اهي دي التخينة اللي فيهم بجد . طبعا أول حاجة بتتزرع فيك انك لازم تكون كبرت و نضجت لما تدخل الجامعة . ما ده طبيعي لإن أصغر ممثل أو ممثلة قامت بدور طالب و طالبة في جامعة كان عندهم 35 سنة و حامل في طفلين . تلاقي الواحد منهم يخلف واحد قدك و طالع طالب في اعدادي هندسة . النقطة التانية انهم يزرعوا فيك احساس انه نادي رياضي أو حديقة أسماك . مافيش مرة تحس فيها ان الممثل في الجامعة علشان يدرس او كده . لا رايح يحب , رايح يتفسح , او رايح يقول لبطل المسلسل اللحية و النقاب . لكن يدرس مين يابا. لو شفت اي مشهد في الجامعة في مسلسل و جابوا الكاميرا من بعيد حولين البطل و البطلة لازم المشهد هيكون فيه 6000 تانين بيحبوا في بعض . واحد ساند على شجرة و الهانم جنبه و التاني قاعد في الكافيتريا مع اصحابه و صحباته . لكن تشوف ولدين ماشيين مع بعض . بنتين مع بعض . واحد بدقن لا اطمن مش هتشوف . فيهيأ لعقلك الباطن ان ده الطبيعي. شغل على كبير يابني.

4- "المرأة الحديدية"
حاول تتفرج على مسلسلين ورا بعض لنجمة الشاشة أو معشوقة الجماهير أو واحدة من اللي بيطلق عليهم لقب زي ده . الست الجميلة الأمورة الضغيرة "مش لازم تقولي يسرا أو نادية الجندي أو الهام شاهين صغيرين لإني متأكد من كده" المكافحة الصابرة اللي الكل عايز يتجوزها إللي ولادها مش مصدقين إن دي امهم , الحنينة اللي دموعها بتنزل من غير ما تبوظ المكياج إللي مابتعرفش تعلى صوتها أو تشتم . اللي بتفاجأ بظلم الإنسان لأخيه الانسان.
و انت تتفرج و تبص لمراتك و ترجع تتفرج تاني و عقلك الباطن بيقول حاجات تصعب بيها على الكافر. مايبقاش مسلسل بجد من غير ما 4 يطلبوا اديها . تجد ان سبحان الله ان مافيش ست غيرها في المسلسل لازم كل واحدة من السنيدة يطلع فيها عيب واضح لييييه . علشان هي المرأة الحديدية.

طب تساؤلات كده على السريع.
-ليه البوليس لما بيروح لمكان يقبض فيه على واحد بيشغل السرينة؟
علشان يعرفوا المجرم انهم جايين ياخدوه فيعرف يهرب و طبعا ياخد له 4 حلقات على ما يقبضوا عليه و الاعلانات و انت عارف.
-ليه المسلسل ممكن يخلص في 15 حلقة يخلص في 40
................................................
-ليه الممثلات في المسلسلات لما يصحوا من النوم في المسلسل شعرهم بيكون متسرح؟
طب و ليه ماسألتش نفسك على الروج يا ناصح..
-ليه " لن أعيش في جلباب أبي" ؟
طب ليه " الضوء الشارد" ؟
حد يجاوبنيييييييييي
:'(